မြန်မာနိုင်ငံဘောလုံး အဖွဲ့ချုပ် (MFF)ဥက္ကဋ္ဌ၏ လမ်းညွှန်ချက်ဖြင့် MFF အထွေထွေ အတွင်းရေးမှူး ဦးကိုကိုသိန်းနှင့် မြန်မာနေရှင်နယ်လိဂ် CEO ဦးစိုးမိုးကျော်တို့သည် မတ်လ ၉ ရက်နေ့က နေပြည်တော် အမျိုးသားလွှတ်တော်ရုံးတွင် ကျန်းမာရေး၊ အားကစားနှင့် ယဉ်ကျေးမှုဆိုင်ရာ ကော်မတီနှင့် တွေ့ဆုံ၍ မြန်မာ့ ဘောလုံးတိုးတက်ရေး အတွက်ဆောင်ရွက်နေသည်များ၊ လူငယ်ဘောလုံး ဖွံ့ဖြိုးရေးနှင့် လက်ရွေးစင် မျိုးဆက်သစ်များပေါ်ထွက်ရေး၊ ပရော်ဖက်ရှင်နယ် ဘောလုံးလောက အောင်မြင်မှုရရှိရေး စသည့်ဆောင်ရွက်ချက်များအား ဆွေးနွေးတင်ပြရှင်းလင်းခဲ့သည်။
အဆိုပါအစည်းအဝေးသို့ မြန်မာနိုင်ငံဘောလုံးအဖွဲ့ချုပ် ကိုယ်စားလှယ်အဖွဲ့နှင့်အတူ အမျိုးသားလွှတ်တော်ရုံး ကျန်းမာရေး၊ အားကစားနှင့် ယဉ်ကျေးမှုဆိုင်ရာ ကော်မတီဥက္ကဋ္ဌ ဒေါက်တာ ဇော်လင်းထွဋ်၊ အတွင်းရေးမှူး ဒေါက်တာစန်းမောင်မောင်နှင့် အဖွဲ့ဝင်များ ဖြစ်ကြသည့် ဦးဝင်းဇော်၊ ဦးဝှေ့တင်း၊ ဒေါက်တာလင်းဝေဖြိုးလတ်၊ ဒေါက်တာကျော်ငွေ၊ ဒေါက်တာ ကျော်သန်းထွန်း၊ မန်းထွန်းကြိုင်၊ နော်ဆာမူထူး အစရှိသည့်ကော်မတီအဖွဲ့ဝင် လွှတ်တော်ကိုယ်စားလှယ်များ တက်ရောက်ခဲ့ကြသည်။
အခမ်းအနားတွင် MFF အထွေထွေ အတွင်းရေးမှူး ဦးကိုကိုသိန်းက မြန်မာနိုင်ငံဘောလုံးအဖွဲ့ချုပ်၏ ငွေကြေးအင်အား အခက်အခဲရှိသည့်ကြားမှ လူငယ်စီမံကိန်းများ ဦးစားပေးဆောင်ရွက်နေခြင်း၊ ဘောလုံးအကယ်ဒမီများ တည်ဆောက်ဖွင့်လှစ်ပေးနေခြင်း၊ လက်ရွေးစင် အသင်းအားလုံး အရှေ့တောင်အာရှ၊ အာရှနှင့်ကမ္ဘာ့ပြိုင်ပွဲ မည်သည့်နိုင်ငံတကာပွဲမဆို ပါဝင်ယှဉ်ပြိုင်နေခြင်း၊ အသင်းများအတွက်ကုန်ကျသုံးစွဲနေမှုများ၊ နိုင်ငံတကာပြိုင်ပွဲများ လက်ခံကျင်းပနေမှုများ၊ အဆင့်အတန်းမီ ကွင်းများမရှိသည့် ကြားမှ နိုင်ငံတကာပွဲများ ကျင်းပပေးနေရခြင်းများ၊ ပြိုင်ပွဲကျင်းပရေးကွင်းနှင့်လေ့ကျင့်ရေးကွင်း မလုံလောက်မှုများ၊ ၂၀၀၅ ခုနှစ်မှ ပြီးခဲ့သည့် ၂၀၁၇ ခုနှစ်အထိ MFF မှသုံးစွဲခဲ့ရသည့် ငွေကြေးအခြေအနေနှင့် အဖွဲ့ချုပ်ဥက္ကဋ္ဌ လှူဒါန်း စိုက်ထုတ်သုံးစွဲခဲ့ရသည့် ငွေကြေးအခြေအနေများ၊ အနာဂတ်စီမံကိန်းများနှင့် နိုင်ငံ့လက်ရွေးစင် အသင်းများ အတွက်ကြုံတွေ့ရမည့် ဘဏ္ဍာရေး အခက်အခဲများ၊ ကွင်းမလုံလောက်မှုအပါအ၀င် စိန်ခေါ်မှုအသီးသီးများ၊ ပညာရေးဝန်ကြီးဌာန၊ ကျန်းမာရေးနှင့်အားကစား ၀န်ကြီးဌာနတို့နှင့်ပူးပေါင်းဆောင်ရွက်နေသည့် လူငယ်ပြိုင်ပွဲများ၊ မြို့နယ်ဘောလုံးအဖွဲ့ချုပ်များ တည်ထောင်နေခြင်းနှင့် ယင်း၏ ရည်ရွယ်ချက်များ၊ နိုင်ငံတကာနှင့်ဆက်သွယ်ဆောင်ရွက်နေသည့် ပြိုင်ပွဲများ၊ ဒိုင်နှင့်နည်းပြသင်တန်းများ၊ ပညာရေးဆိုင်ရာ တည်ဆောက်မြှင့်တင်ပေးနေမှုများအား PowerPoint ဖြင့် ကော်မတီအဖွဲ့ဝင်များအား ရှင်းလင်းတင်ပြခဲ့သည်။
အလားတူ မြန်မာနေရှင်နယ်လိဂ် စီအီးအို ဦးစိုးမိုးကျော်ကလည်း ပရော်ဖက်ရှင်နယ်လိဂ် ပြိုင်ပွဲကျင်းပနေမှုများအား တင်ပြရှင်းလင်းခဲ့ပြီး လိဂ်ပြိုင်ပွဲတွင် ကြုံတွေ့နေရသည့် ငွေကြေးနှင့် အခြေခံအဆောက်အဦ မပြည့်စုံမှု ဆိုင်ရာ စိန်ခေါ်မှုများ၊ ကလပ်အသင်းများ၏ ပူးပေါင်းဆောင်ရွက်နေမှုများနှင့် အသင်းပိုင်ရှင်များမှ မြန်မာ့ဘောလုံးအတွက် ငွေအား လူအား ပူးပေါင်းထည့်ဝင်ဆောင်ရွက်ပေးနေမှုများ၊ အာရှပြိုင်ပွဲများဖြစ်သည့် အာရှချန်ပီယံလိဂ် ACL နှင့် AFC Cup ပြိုင်ပွဲဝင်ရောက်ယှဉ်ပြိုင်နေမှုများအား အသေးစိတ်တင်ပြရှင်းလင်းခဲ့သည်။
ယင်းနောက် MFF ကိုယ်စားလှယ်အဖွဲ့၏ တင်ပြရှင်းလင်းမှုများအပေါ် ကျန်းမာရေး၊ အားကစားနှင့် ယဉ်ကျေးမှုဆိုင်ရာ ကော်မတီ ဥက္ကဋ္ဌနှင့်အဖွဲ့ဝင်များကလည်း သိရှိလိုသည်များကို မေးမြန်းခဲ့ကြပြီး မြန်မာ့ဘောလုံး အနာဂတ်အတွက် အတူတကွ သုံးသပ်ဆွေးနွေးခဲ့ကြပါသည်။
